RINGTU NUN NGHET
Jakoba 1:7-8 :“Chutiang mi, rilru bulbal nei lo, a thil tih zawng zawnga nghet lo mi chuan Lalpa hnenah engmah hmuh inring suh se”.
Matthaia6:24 :“Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tanin pakhat an hmusit ang. Pathian leh sum rawng in bawl kawp thei lo ve”.
Introduction:
Mihringin nitin a nun kan hman dan hrim hrim hi Nun tia kan sawi chu a ni mai a. Ringtuten Pathian kan rinna kawnga nun kan hman dan, rinawm taka Lal Isua zui leh engngemaw changa phatsan leh thin kan nihna lam hi kan sawi uar tur chu a ni ang.
Kan rin Lal Isua hian amah ringtute nun dan turah duhdan a nei a, chu chu Bible ah kan hmu a ni.
Ringtu inti theuh theuh si nun hman dan a in ang lo thei hle a. Thenkhat in an nun pum Krista tan an hlan a, ramthim ramro ah missionary turin an kal vawng vawng a, thenkhat vethung chuan an nun chu setana tan leh Krista tan an hman pawlh fo thin a ni.
Kan khawvel nun hman mek ah hian thalai ten nun inpawlhsawp, a changa kohhran leh K|P ah te active em em, remchang hmuh chuan khawvel thil lam pawh ti ve leh thei mai kan tam em em a, hengte avang hian min lo thlir rengtu ten kan nun an hmuh hian kohhran leh K|P a tel ve an chakloh phah fo \hin.
Chuvang chuan nun inthlak thleng mai mai lo, nun nghet tak, Lal Isua rinawm taka zui chungchang zanin ah hian han sawi ka duh a ni.
TUNLAI KHAWVEL A |HALAITE DINHMUN :
Ram \hanglai kan ni a,Kan ramah hmasawnna kawng hrang hrang a lo awm chho a chu hmasawnna chuan \halai nun pawh nasa takin a sawi danglam mek a ni.
Global village tiin tunlai kan khawvel hi an sawi thin a, internet hmangin ram hrang te kan in thlun zawm vek a, vawiin a thil thleng hi internet leh Tv hmang te in veng chhunga thil thleng, a thlen ni la la a kan hria ang hian khawvel pang lehlam a thil thleng pawh a thlenni in kan hmu in kan hre ve thei ta a ni. Kan khawvel hi a zim em em tawh a ni.
Bungrua chhuak thar :
Khawvel pang lehlama thil thleng te, thawmhnaw, motor, gagets chhuak thar te pawh an pho chhuah ni in kan lo hmu in kan lo hre ve thei nghal tawh a,bazar-ah lei tur pawh kan nei ve nghal zel a ni.
Ram changkang zawk thalai nun kan hmu a an incheina leh an nunzia thlengin kan lo ching ve zel bawk a. American thalai te nen kan duhzawng te pawh a in ang ta reng mai. Movie chhuak thar pawh an rualin kan en ve zel a, thawmhnaw pawh nise a chhuak thar apiang kan lo nei ve zel thei tawh a nih hi.
Nawmchenna :
Sap ho, ringtu hmasa te nun an sawi \hin a, ringtu tha tak tak, Pathian tana inserh hrang tlat mi, an velah, an kawtkai mai ah khawvel nawmsakna chi tinreng pawh awm mahsela, chung thila inhnamhnawih duh hauh lo thalai engemaw zat an awm.
Chutihlai chuan nun herh tak taka nung thinte nun zia chu khawvelah pholan a ni zawk si a. Chu chuan thalaite hi min hnehin chung nun herhho nun dan chu thalai changkang zawk te nun dan tur ve reng emaw tiin kan lo la chhawng ve ta thin a ni.
Social media :
Social media hrang hrang hmang in kan in be tawn a, a tha lam aiin a thalo lamin kan beng a verh zawk a, a tha lam aiin a thalo lamin kan hmang nasa em em bawk a ni. Facebook, Whatsapp ah te lah nise zahmawh buru tak tak englai pawha hmuh tur leh chhiar tur a awm reng a. Heng te hi naupangte te pawhin an chhiarin an hmu ve thei reng bawk a ni.
Mahni anpui kawp ching kan tam em em tawh a, zah a hnekin kan chapopui ta emaw tih tur a ni ta. Neih inang inneih thleng a pawmpui ram leh kohhran te pawh an awm tawh hial a ni.
Chutiang ang khawvel mahni duh zawng leh nuam tih zawng apiang ti mai thin, “ka nun ah lo buai duh suh”, kan tih tawhna khawvelah thalai te hi kan awm mek a ni. Ringtu nun pawh nasa takin a nghawng mek bawk a ni.
3.NUN NGHET CHU ENGTIN NGE KAN NEIH ANG ?
Chutiang anga nun za, awm hle hle theilo, thil a tha lam leh pangngai, tluangtlam lam ai a, maksak leh dangdai, Pathian duh zawng anih leh anih leh nih loh pawh ngaihtuah lohna khawvel a kan awm mek lai hian ringtute ten nun nghet engtin nge kan neih theih ang?
a) Mihring Nun :
Mihring nun hi kawngpui ngil taka kal ang a ni a, kan ding leh vei ah hian kan nun hmanna tur thil tam tak a awm a, chu kannun hmanna tur thil chu mihring te hian kan duh thlanna hmangin kan thlang thin a.
Hetiang hian chu kan nun kawngpui chu Dawr hmun angin han suangtuah ta ila a fiah leh zual theih nan. Kawngpui ngil tak a awm a, chu chu mihring te nun kawng ni ta se, chu kawngpuiah chuan lehlam lehlama dawr awm te chu mihring nun hmanna tur ni ta sela. Lehlam dawr zawng chu ringtuten nun an hmanna tur hmun ni sela a, a lehlam pang zawng chu ringlo mite hun hmanna tur ni bawk se la.
Lehlam dawr ah chuan Biak In te, K|P inkhawm te, Activity hrang hrang, hla zir, hnatlang, member hla te hnuhhnaihna hmun te, Fellowship-na te, \awng\aina hmun te leh a dang dang te a awm a.
Tichuan, a lehlamah ve thung chuan khawvel thil chi hrang hrang dawr a lo awm ve a, Nawmsip bawlna hmun te, Zu zawrna te, Ruihtheih thil chi hrang hrang zawrhna te, mipat hmeichhiat hmanna hmun te, mi relna hmun te, hnathawh peih lohna te, Dik lo taka sum hmuh theihna hmun te leh thil chi hrang hrang a \halo lam chi hlir te a awm ve bawk a.
Chu Nun kawngpui ah chuan mihringte hi nitin mai hian kan kal tlang \hin a. Ringtu nghet chuan a nun hmanna dawr lama a kal lai chuan a thlang lawkah khawvel thil te chu itawm thei ang ber in lo in tlar tuarh mahsela,a tawp chu thihna a ni tih a hriat reng avangin peng lovin a nun chu a hmang ngar ngar mai \hin a ni.
Chutih lai chuan keini \halai engemaw zat te hi chuan chu kan nun kawngpuia kan kal lai chuan a \ha lam/Isua Krista dawr a kal chu a \ha tih hre siin khawvel dawr lo in tlar tuarh mai chu kan nep phal lova, inkhawmna dawr a\anga kan chhuak te hi a thlang lawka zu dawr ah te, mipat hmeichhiat hmanna dawr ah te chuan kan peng leh mai \hin a ni. Tichuan dawr lehlam Lal Isua dawr lamah chuan harhna te leh thil tih chakawm deuh te a lo awm a, thlanglam dawr a\ang chuan kan insawn leh mai \hin a ni.
KTP member te zingah hian nun nghet lo kan tih engemaw zat kan awm a, tin Active member kan tih zingah te pawh engngemaw zat kan awm mek bawk. Anni ho pawh hi a pawi tawh em em laiin Branch Committee member te meuh pawh nun nghet lo engngemaw zat kan awm hi chu thil dik lo tak mai a ni. Thildang engngemaw leh Branch thil tih inrual a awm chang a Committee member nisiin Branch thil aia thildang a ngaih pawimawh zawk fo mai chuan member te chuan engtinnge Branch/kohhran thil chu an ngaih pawimawh theih ang?
Tin, Committee/Active member Picnic leh huau huau thil nuam ti em em te, engemaw changa zu, Beer inve thei mai, mipat hmeichhiatna hman khawloh kawngah pawh mualpho silova fihlim hauh silo hi engzat tak awm ang maw! Pathian hlat ngam silo, Pathian tana nun hmang peih chuang silo hi kan tam hle in a hriat. Bible chang kan chhiar ang khan, “Chutiang mi, rilru bulbal nei lo, a thil tih zawng zawnga nghet lo mi chuan Lalpa hnenah engmah hmuh inring suh se”.
Chutiang reng renga nun kan hman \hin avang chuan chuan miten kan nunah eitur an hmu lova, Lal Isua hi zui tlakah an ngaih loh phah fo \hin a lo ni. Khawvel a ni a suala tluk chang chu thil awm thei a ni a, mahse kan pen bo chang pawhin Lal Isua hnen pan leh thuai ila, Hotu pahnih rawng a bawl kawp theih loh tih Bible in a sawi ang khan khawi kawng emaw zawk zawk chu kan zawh a ngai a ni. Zawh kawp theih ani tlat lo a ni.
a) Ramin hma a sawn zel dawn a, sual na a pung zel bawk anga, kan ramah ngei pawh hian khawvel ram changkang zawk a awm thin nawm chenna hmun, bar, pub leh thil chi hrang hrang te a lo la awm dawn a ni. Tuna ktp member naupang zawk deuh te phei hi chuan chu hun chu kan hmuh phak a rinawm a ni. Chutih hunah pawh chuan nun nghet kan neih a pawimawh hle dawn a ni. Nawmsip bawlna tur hmun awm mang lo, kan siam chawp ah pawh heti tak hian kan nun a nghet lo a ni a suah sual rawngbawlna tur atana a bik taka design ah ngat phei chuan kan ngaihtuah awm hle in a rin awm.
b) Kristian chhungkua :
Nun nghet neih nana thil pawimawh tak chu kristian chhungkua hi a ni a. Nu leh pa ten Pathian lam reng reng an ngaihsak lohna chhungkuaah chuan an fate pawh an vanneih viau loh chuan Pathian lam hawi an harsat tlangpui ni te hian a hriat.
Drug addict leh nun khawlo kan tih te hi za a 90 chu chhungkaw kehchhia kan tih te leh nu leh pa in Pathian lam reng reng an ngaihsak ngai lohna atanga lo seilian te an ni. Chuvang chuan nu leh pa hi an pawimawh em em a ni.
Nu leh Pa ringtu nghet lo, kawi kawi thin te chuan an fate pawh ringtu nghet an ni lo tlangpui awm asin.
Nula leh tlangval te pawh in kan inngaihzawn lai atang hian kristian chhungkua kan dinpui theih ngei tur nupui pasal kan neih a pawimawh khawp mai. KTP a kan rawngbawl pui te ngei hi nei thei ila fuh ber a rinawm. KTP Active member aia khawvel lama tlan te kan duh zawk tlat mai chuan kristian chhungkaw din chu a harsa mai thei a ni.
Tin Kristian chhungkua din thei turin thianghlim taka inngaihzawn lai atang te pawh a awm a pawimawh hle.
Nu leh pa ringtu tha tak, nun nghet tak nei te chu an faten an hai lo reng reng an nu leh pa te nun dan chu nun dan tur ani tih an hria a an zui ve mai a ni. Ringtu Nun nghet nei tur chuan nu leh pa an pawimawh em em a ni.
c) Lal Isua hmangaih :
Mihringte hi Pathian anpuia siam kan ni a, Pathian kan an na kawng khat chu Hmangaihna hi a ni a.
Hmangaihte tan chuan kan neih kan ui lova, an tana tha tur kan duh a, kan hmangaiha te duh anga awm chu kan duh zawng a lo ni a, kan hmangaih a te tan chuan kan nunna hlu tak pawh kan hlan phal thin a ni. Kan hmangaih tak tak te tan chuan kan rinawm thin a, an duh danin nun kan tum thin.
Mi in a kawppui a hmangaih tak zet anih chuan atan a rinawmlo theilo angin Lal Isua hi kan hmangaih takzet anih chuan sual lakah kan phatsan thei ngai lovang. Kan phatsan fo anih chuan Lal Isua hi kan lo la hmangaih tak tak lo a ni mai thei ani. Kan lo phatsan anih pawhin inchhirin, a hnenah ngaihdam dilin an kir leh ngei ngei tur a ni.
Ringtu ten nun nghet kan neih theih nan chuan Lal Isua hi kan hmangaih a ngai a ni.
Lal Isua kan hmangaih chuan kan velah sual tih tur tam tak leh nawm hmel tak tak te pawh lo awm thin mahsela kan pengbo ngai lovanga, atan rinawm takin kan nun kan lo hmang tawh zawk ang, tichuan, miten kan nunah Lal Isua hmel an lo hmu thei dawn a ni.
4. Nun nghet nei tute chuan lawmman an la la dawn :
He khawvel hi kan awm hlenna tur a ni lo tih chu kan hre vek a, mahse setana thlamuanna hi kan nei emaw ni chu tih tur hian sual kawng hi kan zawh ngar ngar mai a ni. Kan nunna hi engtik ni ah emaw chuan a la tawp ve dawn chutih hunah chuan hotu pahnih rawng a bawl kawp theih loh angin hmun pakhat ah chiah kan kal thei dawn a ni. Kan dam laia a rawng kan bawl thin ngei a hnenah chuan kan kal dawn a ni.
Drug tih chhin hi a pawi em em a ni. An vanneih viau loh chuan an nghei mai mai tawh lo. A dam chhan ber chu drug kha a ni tawh mai. An zing thawh atanga an mut thleng in an ruih theih dan ngawt kha an thu pui ber a ni tawh si a. Thalai te pawhin nun nghet nei lova kan awm lohna tur hmun kan awm fo chuan drug leh ruih theih thil tih theihna chance kan nei sang s ni mai.
Kan ram in hma a sawn chho zel anga ktp inkhom laiin football te pawh an la khelh a rinawm. Kohhran inkhom pawh an zah zawh loh tawh lek lek laiin ktp inkhawm te phei chu engteh vak ah a ngaih loh hun a thleng har tawh lovang chutih hunah pawh chuan nun nghet tak kan neih ala pawimawh tulh tulh dawn a ni. Revelation 2:10 I tuar turte hi hlau suh:ngai teh, fiaha in awm theih nan diabola chuan in zinga mi thenkhat tan inah a khung dawn che u a ni; tin, ni sawm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che.
No comments:
Post a Comment